Երբ դեռ Ձեր երեխան շատ փոքրիկ էր, Դուք
ինքներդ էիք զբաղվում նրա ճակատը մազափնջիկներից ազատելու գործով, սակայն
անցավ մեկ-երկու տարի, և հասկացաք, որ նրա սանրվածքը այլևս մասնագիտական
խնամք է պահանջում: Սակայն դեռ պարզ չէ` ինչպես երեխան կընդունի այն փաստը,
որ ինքը պիտի «խելոք» նստի թիկնաթոռին այն ժամանակ, երբ ինչ-որ անծանոթ իր
գլխավերևում մկրատ է պտտեցնում…
Որպեսզի փոքրիկը չսկսի համառել ու լաց
լինել օտար միջավայրում, Դուք պետք է նախապես մանրամասն պատմեք նրան այն
մասին, թե ինչ է լինելու վարսավիրանոցում, և ինչ կպահանջվի իրենից լավ
արդյունք ստանալու համար:
Դուք կարող եք վարսավիրանոց բերել երեխայի
սիրելի խաղալիքը, պատկերազարդ գիրք, որոնք կօգնեն «կրիտիկական» պահերին
հանգստացնել նրան: Որպեսզի վարսավիրանոցում ավելի քիչ ժամանակ անցկացնեք,
լվացեք երեխայի մազերը տանը, իսկ հետո մասնագետը միայն կխոնավեցնի
դրանք: Եթե երեխային հարմար չէ թիկնաթոռը, կարող եք նստեցնել նրան ձեր
ծնկներին. այդպես նա իրեն շատ ավելի ապահով կզգա:
Որոշ
երեխաներ խուճապի են մատնվում` հատակին տեսնելով իրենց կտրված մազերը:
Փոքրիկների մեջ ամբողջականության զգացումը դեռ շատ փխրուն է. նրանք
դժվարությամբ են բաժանվում այն ամենի հետ, ինչ իրենց է պատկանում: Դրա
համար երեխային պետք է անպայման նախապես բացատրել, որ մազերը միշտ աճում
են, և ժամանակ առ ժամանակ անհրաժեշտ է դրանք կտրել, որպեսզի իրենց
ծանրությամբ ու առատությամբ մարդուն անհանգստություն չպատճառեն:
Մի մոռացեք փոքրիկին ասել նաև, որ
վարսահարդարումից հետո նա շատ գեղեցիկ տեսք կունենա: Ձեր հիացական
արտահայտությունները կուրախացնեն նրան, ինչպես նաև վարսահարդարին:
Սակայն եթե այդուհանդերձ վարսավիրանոց
այցելելու օգտին արված համոզիչ փաստարկները հանդիպում են հուսահատ
դիմադրության, ապա արժե վարսահարդարին տուն հրավիրել. իր միջավայրում
երեխան ավելի հեշտությամբ կվստահի անծանոթին: Պատվով հաղթահարելով առաջին
փորձությունը` փոքրիկը հաջորդ անգամ առավել բարյացկամ կվերաբերվի
վարսավիրանոց այցելելու Ձեր առաջարկությանը:
Վարսահարդարման նկատմամբ երեխայի վախը
հաղթահարելու մեկ միջոց ևս. թող նա Ձեր կողքին լինի, երբ հարդարում են հենց
Ձեր վարսերը: Այդ ժամանակ փոքրիկը կտեսնի, որ վտանգավոր ոչինչ չկա:
Ավելին` համակված մեծահասակներին նմանվելու փափագով` նա գուցե և ուրախանա,
որ իր մազերը նույնպես կտրելու են:
Մեկ-երկու այցելություն վարսահարդարին, և Ձեր փոքրիկն արդեն ինքը կպահանջի գեղեցիկ սանրվածք, երբ դրա անհրաժեշտութունը զգա: