Տարիներ
առաջ, երբ մեծահասակներն ինձ ուղարկում էին «ժամը նայելու», գնում,
կանգնում էի մեծ ու փոքր, երկար ու բարակ սլաքների առաջ ու հուսահատ կերպով
փորձում հասկանալ, թե որ սլաքը ինչ է ուզում ինձ ասել: Թե երբ և ինչպես դա
ինձ հաջողվեց, չեմ կարող ստույգ ասել, բայց այն, որ դա բավական դժվար
առաջադրանք էր փոքրիկ երեխայի համար, հաստատ է:
Իրականում մայրիկներն ու հայրիկները կարող
են հեշտությամբ օգնել իրենց փոքրիկին և ժամացույցի սլաքներից գլուխ հանելը
դարձնել ուրախ ու հետաքրքիր խաղ նրանց համար: Եվ ահա թե ինչպես:
Չկա որևէ հատուկ ցուցում, թե երբ է պետք
սովորեցնել երեխային օգտվել ժամացույցից: Կարևորն այն է, որ երեխան արդեն
որոշակի պատկերացում ունենա ու հասկանա, թե ինչ է իրենից ներկայացնում
թվերի աշխարհը: Նա պետք է ոչ միայն բարձրաձայն հաշել կարողանա, այլև
տարբերի թվերի տեսքը:
Երեխան ավելի արագ կսովորի ժամացույցից
օգտվել, եթե նրա ժամացույցը լինի մեծ, պայծառ թվերով: Այդպես նա ավելի արագ
կհիշի թվերի դասավորությունը: Մասնագիտացված խանութներում մանկական
ժամացույցների մեծ ընտրություն կա թե աղջիկների, թե տղաների համար: Եթե
որոշել եք երեխայի համար ոչ թե ձեռքի, այլ պատի ժամացույց գնել, ապա դրեք
կամ կախեք այն որևէ երևացող տեղում, այնտեղ, ուր երեխան անց է կացնում իր
օրվա մեծ մասը:
Որքան
հնարավոր է շատ հրավիրեք երեխայի ուշադրությունը ժամացույցի վրա: Օրինակ՝
պատմեք նրան, թե երբ եք արթնացել, երբ պետք է գնաք ճաշելու և երբ կարելի է
իջնել բակ խաղալու: Բացատրեք երեխային, որ ամեն օր որոշակի թվով ժամերից է
բաղկացած: Իսկ ժամացույցի սլաքը մեկ օրվա ընթացքում հասցնում է երկու
շրջապտույտ կատարել ժամացույցի շրջանակում: Փորձեք նրա հետ ձեր գործերը
պլանավորել ժամացույցի օգնությամբ: Օրինակ՝ մինչև երկար սլաքը տեղաշարժվի 3
թվից 7-ը, նա պետք է ավարտի իր նախաճաշիկը:
Հիմա ժամանակն է բացատրելու վայրկյանները,
րոպեները և ժամերը ցույց տվող սլաքների կապը: Պատմեք նրան, որ րոպեները
ցույց տվող սլաքը կկատարի մեկ փոքրիկ քայլ այն ժամանակ, երբ վայրկյանները
ցույց տվող սլաքը մեկ լրիվ պտույտ կատարի: Նույն կերպ կտեղաշարժվի նաև
ժամերը ցույց տվող սլաքը, երբ իր պտույտն ավարտի րոպեներ ցույց տվողը:
Ամենամեծ հարցը, որ տանջում է երեխաներին,
սա է. «Ինչո՞ւ է սլաքը գտնվում 4 թվի վրա, բայց մենք այդ դեպքում ասում
ենք 20 րոպե կամ վայրկյան»: Այդ դժվարությունը հաղթահարելու համար փոքրիկ
թղթի կտորներ ամրացրեք ժամացույց թվերի կողքին, որոնց վրա գրված կլինի
«5»-ը նշանակում է 25 րոպե, «6»-ը՝ 30 րոպե և այլն: Այս դեպքում պետք է
հենց երեխայի հիշողության վրա հիմնվել և շատ շուտով նա կսովորի նաև այդ
օրինաչափությունը: Դե իսկ ժամացույցի սլաքների մասին հեքիաթն էլ միայն կհեշտացնի ձեր ու ձեր փոքրիկների գործը: