Առաջին անգամ ատամնաբուժարան գնալը լուրջ
փորձություն է յուրաքանչյուր փոքրիկի համար, բայց կարող է դառնալ կարևոր
արարողություն, որը երեխան կկատարի եթե ոչ հաճույքով, ապա գոնե
պատրաստակամորեն: Ամեն ինչ իրականում կախված է հենց մեծահասակների
վերաբերմունքից:
Շատ կարևոր է, թե ինչպես են
ատամնաբույժին վերաբերվում երեխայի ծնողները: Չէ՞ որ կան մեծահասակներ,
ովքեր անգամ հասուն տարիքում վախենում են ատամնաբուժարան գնալուց: Այդ
դեպքում ի՞նչ կարող ենք պահանջել փոքրիկ երեխայից:
Նախևառաջ ծնողները պետք է քաջ գիտակցեն,
որ երեխային պարբերաբար ատամնաբույժի մոտ տանելը պարտադիր է, անգամ եթե
«սևացած» ատամ չկա: Եվ ծնողները, և երեխաները պետք է հասկանան, որ
ատամնաբույժին պետք է պարբերաբար այցելել պրոֆիլատիկ ստուգումների համար:
Իհարկե, 6-7 տարեկան երեխայի մոտ կամային
հատկանիշները դեռ այնքան էլ լավ չեն ձևավորված, նրա համար հեշտ չէ երկար
ժամանակ անշարժ նստել իր տեղում՝ այն էլ բացված բերանով: Իսկ եթե այս
ամենին գումարում ենք այն, որ նրա բերանի մեջ էլ անծանոթ մարդիկ «ինչ-որ
բա՞ն» են անում…
Եվ այնուամենայնիվ, յուրաքանչյուր երեխայի
հետ էլ հնարավոր է լեզու գտնել ու բացատրել ամեն ինչ երեխային «հասկանալի»
լեզվով: Այս հարցում կարող են օգնության հասնել մանկական
ատամնաբուժարանները: Այսպիսի ատամնաբուժարանում աշխատող բժիշկները շատ լավ
գիտեն, թե ինչ մոտեցում է հարկավոր ցուցաբերել և ինչպես է հնարավոր համոզել
երեխային:
Իհարկե,
կան երեխաներ, ովքեր ոչ մի դեպքում թույլ չեն տալիս իրենց բուժել: Բայց
մանկական ատամնաբուժարանների հոգեբանները վստահեցնում են, որ երեխայի
կամակորությունը պայմանավորված է միմիայն նրա ծնողների՝ ատամնաբույժների
հանդեպ ունեցած վերաբերմունքով: Այնպես որ, Ձեր երեխային ատամնաբուժարան
տանելու համար հարկավոր է ոչ թե նրան համոզել, այլ ինքներդ Ձեզ:
Ահա այն դեպքերը, որոնք կարող են խնդիրներ առաջացնել:
Ծնողներն իրենք են վախենում ատամնաբույժից:
Իսկ երեխային ատամնաբույժի մոտ տանելիս
կրկնակի են վախենում ու սարսափով պատկերացնում, թե որքան է «տանջվելու»
իրենց փոքրիկ բալիկը: Միանգամայն պարզ է, որ վախն անմիջապես կփոխանցվի
երեխային:
Ծնողները չեն վստահում բժշկին:
Սովորաբար այդպիսին են մայրիկները, ովքեր
չեն վստահում իրենց երեխայի դաստիարակությունը մանկապարտեզի
դաստիարակչուհուն, երեխայի խնամքը՝ տատիկ-պապիկներին, հետևաբար երեխայի
առողջությունն էլ ատամնաբույժին չեն վստահի: Իսկ այդ ամենը շատ լավ
հասկանում է երեխան ու նրա մոտ էլ ձևավորվում է ճիշտ այդպիսի վերաբերմունք:
Ծնողները հաշի չեն առնում երեխայի աշխարհընկալումը:
Ատամնաբուժարան գնալու ճանապարհին սկսում
են բացատրել, թե ինչպես են քաշելու կամ «տաշելու» նրա ատամը, պատմում են
իրենց «տխուր» փորձից: Իսկ երբ արդեն հասնում են ատամնաբուժարան, բնական է,
որ երեխան էլ չի ցանկանա մոտ գնալ «սարսափելի» բժշկին:
Կա և ավելի վատ տարբերակ, ամեն հնարավոր
ու անհնար դեպքերում երեխային վախեցնում են ատամնաբույժով, ինչպես, օրինակ,
Մեշոկ պապիկով: Մինչդեռ երեխային առհասարակ չի կարելի վախեցնել որևէ
«սարսափելի» արարածով:
Բայց մեր ժամանակներում մայրիկներն ու
հայրիկները կարող են հանգիստ լինել, նոր տեխնոլոգիաները և պրոֆեսիոնալ ու
կիրթ ատամնաբույժները կօգնեն փոքրիկ երեխային առաջին այցելությունը
ատամնաբուժարան դարձնել հետաքրքիր ու հնարավորինս անցավ: Իսկ ծնողների
ամենամեծ ներդրումը կլինի այն, որ սովորեցնեն երեխային ամենից առաջ հոգ
տանել սեփական առողջության մասին: