Փոքրիկի համար կոշիկ
ընտրելը ամենակարևոր առաջադրանքերից մեկն է մայրիկների համար, չէ՞ որ հենց առաջին մանկական կոշիկները
կարող են լուրջ ազդեցություն ունենալ երեխայի ոտնաթաթի կառուցվածքի ու քայլվածքի ձևավորման վրա:
Առաջին կոշիկները երեխայի համար պետք է
գնել, երբ նա արդեն կարողանում է ամուր կանգնել գետնի վրա. այսպես է
խորհուրդ տալիս մանկաբույժների մեծամասնությունը: Չէ՞ որ եթե երեխան դեռ չի
քայլում, կոշիկներին հրաշալի կփոխարինեն փափուճիկները՝ առանց ցավեցնելու
ու հոգնեցնելու նրանց պստլո տոտիկները:
Բայց եթե արդեն եկել է ժամանակը, ուրեմն
հարկավոր է ընտրել և գնել ճիշտ ու հարմարավետ մանկական կոշիկ: Փոքրիկին
անպայման վերցրեք Ձեզ հետ: Երբեք մի գնեք նրա համար կոշիկ առանց այն
փորձելու նրա ոտքի վրա: Փորձելիս ստուգեք, որ կոշիկի ծայրի և փոքրիկի բութ
մատի միջև մոտ 1 սմ ազատ տեղ լինի, որպեսզի տոտիկն ազատ շարժվի կոշիկի մեջ:
Բացի այդ, մի մոռացեք, որ փոքրիկ երեխաները շատ արագ են մեծանում:
Կոշիկը փորձելիս երեխային քայլեցրեք և
կզգաք՝ արդյոք նա իրեն հարմար է զգում այդ կոշիկի մեջ: Իսկ հանելուց հետո
ուշադիր զննեք տոտիկը և համոզվեք, որ կոշիկը չի սեղմել ու չի կարմրացրել
այն:
Կոշիկի ետին մասը պետք է ավելի հաստ լինի,
քան մնացած հատվածները, որովհետև հենց այս հատվածն է որպես հենարան
ծառայում փոքրիկի քայլելու ընթացքում:
Եվ, իհարկե, խորհուրդ է տրվում գնել կոշիկ բնական նյութերից՝ զամշ, կաշի և այլն, որպեսզի երեխայի ոտքը կարողանա «շնչել»:
